Previzaun Tempu ba Fim de Semana, inklui Segunda-Feira (19-21 Setembru 2026)

💨 KONDISAUN ANIN (KM/H)

📢 ALERTA BA INTENSIFIKASAUN ANIN ho kategoria FORTE ba FORTE LIU/extremu iha REJIAUN KOSTEIRAS, iha territoriu Timor laran tomak, liu-liu iha KOSTA NORTE, LESTE no SUL

Intensifikasaun ANIN FIM DE SEMANA ne’e nia laran inklui SEGUNDA-FEIRA sei kontinua persiste, iha ne’ebe varia husi MODERADU/naton ba FORTE LIU/EXTREMU (20-38 Km/h) kuaze iha territoriu nasional, exceptu munisipiu ERMERA mak kondisaun refere sei varia husi NORMAL (8-15 km/h). Detallu liu bele hare iha (tabela) anexu.

🌊 KONDISAUN LALORAN-TASI (M)

⚠️🌊 ATENSAUN ESPESIAL BA KONDISAUN LALORAN TASI NIA A’AS tantu iha KOSTA iha KOSTA SUL, liu-liu iha munisipiu VIQUEQUE no LAUTEM

Laloran tasi nia A’AS ba FIM DE SEMANA inklui SEGUNDA-FEIRA, sei varia husi NORMAL ba MODERADU/naton (0.5-1.3 m) iha KOSTA NORTE, exceptu iha KOSTA SUL mak kondisaun refere sei varia husi MODERADU/naton ba FORTE (1.1-1.7 m)

⛈️ KONDISAUN TEMPU EM JERÁL

Ministério dos Transportes e Comunicações (MTC) liu husi DNMG hakarak informa ba publiku katak kondisaun atmosfera ba FIM DE SEMANA inklui SEGUNDA-FEIRA sei kontinua persiste ESTAVEL, maibe ho permanensia tranzisaun MONSAUN AUSTRALIA nian assosia ho fator lokal no topografia ilha Timor nian, sei kontinua favorese UDAN ho intensidade CHUVISKA ba FRAKU kuaze iha territoriu nasional, tantu iha periodu DADER ba MEIO-DIA kuantu iha periodu LOROKRAIK ba INISIU KALAN.

🌫️ MENSAJEN IMPORTANTE

• ALERTA BA INTENSIFIKASAUN ANIN ho kategoria FOERTE ba FORTE LIU/extremu iha REJIAUN KOSTEIRAS liu-liu iha munisipiu sira ne’ebe ho marka kor SABRAKA-MEAN;
• Husu ba maluk peskador sira no operasaun transporte maritima ne'ebe mak hala'o atividade peska no operasaun rô (DILI-OECUSSE-ATAURO) atu toma maximu atensaun ba eventual refere, atu nune’e evita dezastre sira ne’ebe ita hotu la espera;
• Maske LALORAN TASIA NIA A’AS iha tantu iha KOSTA NORTE kuantu iha KOSTA SUL kontinua varia husi NORMAL ba FORTE, maibe ho influensia husi intensifikasaun ANIN ne’ebe ho kategoria FORTE LIU/extremu provavelmente bele altera/muda laloran tasi nia A’AS iha kualker momentu.
• Kazu emergênsia ruma ou karik presiza halo evakuasaun, mantein kalma nafatin, evita paniku no rona orientasaun husi Autoridade Lokal ou Pessoal Protesaun Sivil ne'ebé besik;

Akompanha nafatin atualizasaun informasaun kona ba previzaun Tempu husi DNMG Timor-leste.

AVIZU Emitidu: 18/09/2026 (18:00 OTL)

AVIZU validu: 22/09/2026 (00:00 OTL)

Ekipa Previzaun Tempu no Eventu Extremu DNMG-MTC, la haluha hato'o "BOM FIM DE SEMANA" ba ita hotu”